Lanzamento das Charlas DigiTalent nos centros educativos

A Axencia para a Modernización Tecnolóxica de Galicia (Amtega) a través da colaboración de grandes empresas do sector achegará a partir de marzo aos centros educativos unha oferta de charlas co obxectivo de mellorar a visión e percepción que o alumnado ten do mundo TIC.

O alumnado dos centros interesados terá a oportunidade de recibir unha charla da man de profesionais do sector TIC para coñecer a súa experiencia e proxectos baixo temáticas vinculadas ás novas tendencias dixitais como a Intelixencia Artificial, o Blockchain, a Ciencia do dato ou a Ciberseguridade, entre outras.

Desde o 28/02/2020 ata o 06/03/2020 os centros educativos poden inscribirse nas charlas nas que estean interesados consultando a listaxe de charlas ofertadas polas empresas colaboradoras e a temática das mesmas, coa finalidade de promover no seu centro o atractivo vocacional das carreiras STEM.

Desenvolvemento da actividade

• Os centros educativos interesados poden solicitar a inscrición en ata 3 charlas distintas a través do formulario habilitado para a inscrición, para recibir nas súas instalacións os obradoiros.
• As prazas dispoñibles asignaranse aplicando o resultado dun sorteo que se realizará unha vez rematado o prazo de inscrición tendo en conta as opcións sinaladas no formulario.
• A continuación, serán as empresas as que se poñan en contacto cos centros educativos para concretar a data e o horario da charla a través do número de teléfono indicado no formulario, sendo o período de celebración dos obradoiros desde marzo ata xuño de 2020.
• No caso de resultar necesario contar con autorizacións asinadas polos pais/nais/titores legais será o centro educativo o encargado da xestión. 

Na web de DigiTalent está dispoñible todo o detalle da actuación así como o formulario de inscrición para os centros educativos interesados.