Tecnólog@ por un día - 10ª Edición
Impulsada pola Axencia para a Modernización Tecnolóxica de Galicia
Actividade na que os participantes se achegarán en primeira persoa ás profesións dixitais a través da inmersión en proxectos reais ou con encontros con responsables de talento ou profesionais sénior.
Tecnólog@ por un día é unha actividade na que estudantes de 12 a 17 anos poderán achegarse ás profesións dixitais e ter a oportunidade de experimentar, en primeira persoa, unha xornada laboral con profesionais das empresas do sector TIC en Galicia.
A décima edición volverá a celebrarse presencialmente, con prazas dirixidas a dous grupos de idade: de 12 a 14 e de 15 a 17 anos.
SOLICITUDE DE INSCRICIÓN (Do 18 de marzo ao 9 de abril de 2024)
Cada centro educativo, a través do persoal docente, inscribirá aos alumnos/as interesados, que deberán contar coa autorización dos pais/nais/titores legais.
O alumnado entregará no centro educativo a solicitude de autorización debidamente cuberta e asinada que o docente deberá subir ao cumprimentar o formulario de inscrición.
O formulario de inscrición recollerá a listaxe de prazas dispoñibles, segundo as distintas modalidades ofertadas polas empresas colaboradoras, ás que o alumnado poderá optar segundo a súa preferencia (ata un máximo de 3).
ASIGNACIÓN DE PRAZAS
As prazas asignaranse aplicando o resultado dun sorteo público que se celebrará durante a terceira semana de abril Edificio CINC da Cidade da Cultura. A partir do 16 de abril, os docentes recibirán no enderezo electrónico sinalado no formulario de inscrición unha comunicación co resultado do sorteo e os pasos a seguir.
DESENVOLVEMENTO DA ACTIVIDADE (Do 18 de abril ao 31 de maio de 2024)
As empresas poñeranse en contacto cos/coas participantes para concretar a data e o horario da xornada e comunicarán ao alumnado e aos docentes as instrucións e outra información de interese para o desenvolvemento da xornada: lugar de celebración, axenda da sesión, autorización para a captación de imaxes...
DOCUMENTACIÓN DE INTERESE
Baixo esta ficha, atópanse dispoñibles para descarga os manuais do docente, o alumno e o profesional, nos que se poden consultar en detalle as instrucións, aspectos chave e consellos prácticos para o desenvolvemento do programa.
Ademais, ponse a disposición o modelo de autorización que o alumnado debe entregar no centro educativo cuberto e asinado polos pais/nais/titores legais.
Rapaces e rapazas de 12 a 17 anos
Anexo | Tamaño |
---|---|
Autorización de participación | 437.24 KB |
Manual do docente | 2.04 MB |
Manual do alumnado | 1.75 MB |
Manual do profesional | 2.19 MB |
Listaxe de prazas | 15.03 KB |